أما بعد , كنت قدّمت المرة فاتت مقدمة بسيطة عن انفصام الشخصية الجماعي في مجتمعنا , وألقيت الضوء في المقال السابق عن بعض مظاهر الإنفصام الديني اللي بيبلغ ذروته في أوقات معينة وبيخلّي الجماعة تقلب من أقصى اليمين لأقصى اليسار بين ليلة وضحاها , والنهاردة هتكلم عن أشكال أخرى من هذا الإنفصام أو " التناقض " أو " النفاق " أو أي تسمية تحبوها بتعبر عن المعنى ذاته .
من الأشكال الأخرى لحالة التناقض دي , الانفصام الأخلاقي , بمعنى إن فرد أو جماعة بيمارسوا أو بيدّعوا أخلاق وقيم معينة وبيعملوا عكسها في نفس الوقت أو في وقت تاني , فمثلاً هتلاقي إنك وانتَ نازل مبسوط من بيتكُم رايح أحد مشاويرك السعيدة , وراكب المترو , هتلاقي اتنين بيتخانقوا عشان فيه واحد منهم وهو داخل من الباب في الزحمة خبط في التاني خبطة خفيفة في كتفه اليمين من غير قصد , وهتلاقي الخناقة كبرت فشخ والأصوات عليت والشتايم اتخذت منحنى متصاعد من ( متحاسب ياعم ) لـ ( ياعم مش قصدي ) مروراً بـ ( تصدق انك قليل الأدب ومش متربي ! ) و ( أنا قليل الأدب ؟! أنا متربي أحسن منك ومن اللي خلفوك ! ) انتهاءاً بـ ( اللي خلفوا مين يابن الوسخة ؟! ) و ( انا ابن وسخة ؟! تصدق انك عيل ابن ****** ؟! انا مش هاسيبك النهاردة ! ) , وطبعاً ضروري جداً المشهد ده ينتهي بمد الأيدي والصفع وتكدير كل الناس اللي في وسطهم , وبالإضافة للمحادثة العجيبة اللي فاتت اللي بتعبر عن إن الطرفين معندهمش أي قدر من التسامح أو كظم الغيظ أو العفو أو الهدوء , وإنهم مش متربيين أحسن تربية زي ما بيدّعوا , فهتلاقي واحد منهم وهو خارج بيقول ( شعب متخلف ! شعب يستاهل الحرق ) , ومبيكونش مدرك إن التخلف والهمجية دي هي نتاج لمجموع من الأشخاص في مثل عصبيته وبذاءته وغباءه .
وهتلاقي صاحبك اللي بيقرف وبيتأفف من أي منظر وحش , بيتِف في الأرض وهو ماشي جنبك , ومعندوش مانع إن الناس تشوف قرفه وقرف ناس كتير بيقوموا بنفس الفعل , وبيحولّوا الأرض اللي الناس بتمشي فيها وبتدوس فيها وبتبص فيها , لحوض كبير يحتمل كل أنواع اللُعاب والبلغم والمرض , أنا قرفت من كتر ما بشوف المنظر , امتا الناس اللي بتتف هتدرك ان دي أرض الناس عايزة تمشي عليها من غير حاجة تقرفها , مفيش منديل ؟ الموضوع كبر أوي ومحتاج ثورة على العفانة , النهاردة نتف عالأرض , بكرة نبربر , بعدُه نرجّع , بعد بعده نتبول ونعمل كل حاجة وميبقاش فيه فرق بينّا وبين الحيوانات اللي " بنقرف " ندوس عالحاجات بتاعتها , وعجبي .
وهتلاقي صاحبك التاني اللي فالق دماغك طول النهار بجمل من نوع " مصر دي السجن اللي اتولدنا فيه , انا هخلص واهرب على اي حتة بعيد عن هنا " , " بص الزبالة في كل حتة ازاي ؟ شعب قذر " , هتلاقيه في نفس اللحظة بيرمي الكان اللي خلصها في الشارع , وكإن اللي بيكلمك واحد وده واحد تاني مختلف عنه , ولما تسأله يقولك " ياعم دي بلد معفنة , مفيهاش سلة زبالة " , رغم انه لو مشي شوية ممكن يلاقي , وكإنه مش عارف إن أكوام الزبالة اللي ريحتها وحشة دي مانزلتش من السما كدة , وبدأت بواحد مستهتر أو كسول قرر يتخلص من زبالته في وش الناس , وقرر يبقى نضيف على حساب نضافة الشارع .
وهتلاقي صاحبك التالت بفخر شديد بيقولك : " أنا مصاحب تلاتة في نفس الوقت , وبحبهم كلهم " ولما تتصدم وتسأله ازاي يقولك " ماهي دي الشطارة , ولا واحدة في عارفة , وكل واحدة فيهم حاسة انها أكتر واحدة اتحبت في العالم " , وهتلاقيه بيعامل البنات كإنها رفاهية من رفاهيات الدُنيا , وتسالي نقدر نشغل وقتنا بيهم , مش أشخاص مستقلين , ولكن مجموعة متنوعة من الأشياء بتخدم الغرض نفسه , الانبساط , وتلاقيه طول ماهو ماشي يقول : " إمبارح عملت أدد لفلانة , محترمة فشخ بس جرّيت معاها كلام " , " النهاردة شُفت في النادي واحدة إنما إيه , فرس , بتمشي مع واحدة اعرفها هخليها تعرفني عليها ;) " , " بص ياض البت اللي سايبة شعرها هناك دي ؟ شكلها شمال فشخ " , " أنا مصاحب تلاتة آه , بس اللي اتجوزها وارتبط بيها بجد لازم تكون مصاحبتش قبل كدة , لازم تكون محترمة " , طب فيه سؤال هنا , إزاي العدل الإلهي هيسمح لواحدة محترمة تتجوز واحد مش محترم ؟ واحد مبيقدرش مشاعر الناس ولا حبهم , فاكر انه الواد الجامد اللي مفيش زيه وإن كل البنات دي خواتم في صباعه يقلعهم ويلبسهم كيفما شاء , وإنهم مش مجموعة وإنما أفراد مستقلين ليهم عواطف كاملة ومشاعر كاملة وعقول كاملة بس تم خداعهم للأسف بالكلام الملون , أو واحد اعرفه بيحب واحدة وناوي يتجوزها فعلاً بس مصاحب واحدة تانية عشان تقضية الوقت في الكلية , فلانة هي الأصل , لأ علّانة دي قشطة يعني , أو واحد يفضل طول ماهو ماشي في الشارع يبص للبنات ويعاكسهم ويتكلم عليهم , وميقدرش حد يجيب سيرة أخته وهو موجود , عندي قناعة إن الناس دي أياً كانت ولاد ولّا بنات مش هتنبسط في حياتها , وكل اللي عملوه في الناس هينقلب عليهم في يوم , عدالة السماء , كما تُدين تُدان .
وهتلاقي صاحبك الرابع ( الذكوري ) كل شوية يقولك : " إلحق يلا البت اللي بتشرب سجاير هناك دي , دي شرموطة " مع إنه بيشرب حشيش , أو يقولك " البنت اللي بتشتم تبقى شمال , معروفة يعني " مع إن هو مفيش 5 دقايق تعدي غير اما يشتم أو يشخُر عالأقل , النظرة الذكورية للبنات أو ( النساء ) بشكل عام على إنهم كائنات أقل وإن الرجالة من حقهم كل حاجة والبنات لأ , الرجالة ممكن يشتموا , البنات لأ , الرجالة ممكن يشربوا سجاير وشيشة وحشيش ومخدرات ويشمّوا ويسكروا , عادي شباب بقى وبيلعبوا هيهي , البنات لأ , الرجالة ممكن يغلطوا ويعملوا نزوات ويبرطعوا يمين وشمال , معلش انحراف بسيط سيبيهم يتدلعوا , البنات لأ , أخطاء كتير ممكن تتبرر للرجالة وتتحرم عالبنات رغم إنها المفروض تكون أخطاء عالكل , المفروض نقول " الواد ده بيشتم , ده قليل الأدب " - كمثال على إطلاق الأحكام العشوائي - , زي ما بنقول عالبنت بالظبط , معاني كتير غلط انتشرت نتيجة لجهل المجتمع واستهتاره وسلبيته وفساده , وطبعاً البنت اللي بيتم التحرش بيها ممكن نواسيها بكلمتين مش ناخدلها حقها , لأ وممكن كمان نقولها مانتي اللي لابسة غلط , على أساس ان لبسها لازم يكون بموافقة المجتمع كله اللي هيتفق ان ده لبس محترم مابيثيرش الغريزة عند الحيوانات اللي بنحميهم وندافع عن سلوكهم المنحرف ونخليهم يتمادوا في الفساد أكتر وأكتر .
وهتلاقي قريبك اللي طول النهار والليل يلعن الرشوة والفساد والمحسوبية اللي ودّوا البلد في داهية , راح امبارح يخلص ورق وغمز الموظف بحاجة في جيبه , ودي غمزة يعني ولا هي رشوة ولا حاجة , وعيّن ابنه معاه في الشغل الحكومي عشان ياعيني الواد مش لاقي شغل , واهو نبقى مع بعض اساعده وأكبره , ودي ولا محسوبية ولا حاجة .
ركز في الفرق بين أفعال الناس وأقوالهم هتلاقي جبل من التناقضات اللي بتوصف فساد المجتمع كله , هتلاقي الناس كلها بتتكلم عن الحاجات الحلوة وتحسسك إنها الشخصيات الأمثل في العالم وعلى العكس هتلاقي الحاجات الوحشة هي بس اللي بتحصل , ده نابع من الانفصام والتناقض اللي جوة كل واحد منهم , والنفاق اللي بينافقه لنفسه وللناس عشان شكله يبقى أحسن , حتى انت وأنا جوانا تناقضات كتير بين الأفعال والكلام لازم نتأمل فيها ونصلّحها , لازم نصلّح نظرتنا للناس ومعالجتنا للمشاكل من قبل ما تحصل , المشاكل بتيجي من أفعال والأفعال بتيجي من أفكار والأفكار بتيجي من عقلك ( النظام والوعي ) وقلبك ( الإحساس ) ونفسك ( المبادئ أو الأساس اللي انتَ اتخلقت بيه أو الشخصية ) , قبل ما تبص للعالم اللي حواليك وتشتم وتلعن وتغضب بص جواك وشوف انت صح ولا غلط , شوف انت جزء من الصورة الكبيرة اللي بتشتمها دي ولا لأ , شوف انت عملت حاجة تصلح المشاكل دي ولا لأ ؟ بدأت بنفسك ولا لأ ؟ وأنا متأكد إنك لو بصّيت جوة هتشوف أحسن :) , بسم الله الرحمن الرحيم , { إِنَّ اللَّهَ لَا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ } , صدق الله العظيم .
ليست هناك تعليقات:
إرسال تعليق